RĪPEKA TUPUA 5

Tēnā rā koutou!

Ki te kōrero tētahi rōpū i ngā āhuatanga tātai me whakarite ngā kupu, ngā kīanga, ngā tikanga e whakaae ai te hunga katoa. 

Tērā pea ka rere kē te tikanga o tētahi kupu e ai ki te kaupapa. Ahakoa rā me whakaae te tikanga tātai.

Hei tauira, ko ngā rīpeka tupua o te putanga o mua. E waru ngā rīpeka tupua rere kē e mau ana te 1 i te pū, waihoki ngā ripa e mau rā ngā tau o ngā pito e rite ana. Nō reira, ehara ngā rīpeka i te rere kē rawa, ehara hoki i te rite pū. Me whakaae tātou ki hea mutu ai te hanga rite, ki hea hoki tīmata ai te hanga rere kē. 

I te mahi nei, arā, i te rapurapu i ngā rīpeka tupua e mau nei ngā tau i te 1 ki te 5, ka kōrerohia te haurite o ngā rīpeka. Nō reira, ko te mea e rite pū ana ko ngā rīpeka e mau ana te 1 i te pū. Mehemea e pērā ana, ko te 2 te hoa tauaro o te 5, me te 3 tō te 4. Engari te takotoranga o aua hoa tauaro - e rere kē ana. Hei aha rā i te kaupapa tātai nei, he haurite tonu!

RĪPEKA TUPUA 4

Kia ora rā!

Ka uriuri tō tātou kōtiti ki hanga kē, ā, hei reira whakatau ai i ngā kōrero whakamārama. E mārama ana? Taihoa rā ka mārama atu!

Titiro ki ngā rīpeka tupua e waru kei raro iho nei.

Ko te pātai ake, he rite rānei, he rere kē rānei ngā rīpeka katoa?

He ōrite ētahi hanga. Ko te 1 kei te pū o ngā rīpeka katoa. Ko te 2 te hoa tauaro o te 5, ā, ko te 3 tō te 4.

He aha te rerenga kētanga o te rīpeka 1 i te rīpeka 2? He ōrite ngā ripa whakapae, 4-1-3. Engari kua huripoki te ripa poupou i te 2-1-5 ki te 5-1-2.

He hoa huripoki anō o te rīpeka 1? Tēnā, rapua ngā hoa huripoki katoa.

He hoa rere kē te rīpeka 1 me te rīpeka 6. Kua huri te ripa whakapae hei ripa poupou. Waihoki te ripa poupou kua huri hei ripa whakapae. Nō reira he hoa hurihuri aua rīpeka. Māu rānei ngā hoa hurihuri katoa e rapu?

He hoa aha te rīpeka 1 me te rīpeka 5? He hoa anō e pērā ana?

RĪPEKA TUPUA 3

4 + 1 + 3 = 2 + 1 + 5

             8 = 8

Anei ētahi kōrero hei āwhina i a koutou.  

Kāore i kore kua whirihia tēnei hei rīpeka tupua:

He mea tupua te rīpeka nei i te mea he ōrite te tapeke o te rārangi whakapae ki tō te rārangi poupou.

Arā, ka tāpiripiri atu ia ripa tau, ia ripa tau ki te 8. 

Ina tāpiritia ngā pito o ia ripa, o ia ripa, ka ōrite hoki.

                4 + 3 = 2 + 5
                       7 = 7

Kei kī mai koutou, 'Nō reira?' Heoti... nō reira ka tāpiripiri atu ngā pito katoa ki te 14. Ina tāpiritia hoki te pū, arā, ko te 1, ka 15. Tērā pea i te mōhio kē koutou, koina te tapeke o ngā tau katoa.

          1 + 2 + 3 + 4 + 5 = 15

Kei pūkana ngā karu! Kei konei te pae tata o tētahi rautaki e tae ai ki te pae tawhiti. E mea ana tātou, kia tupua te rīpeka, me ōrite te tapeke o te ripa whakapae ki tō te ripa poupou, ā, me rite hoki ngā tapeke pito. 

Te mārama hoki! Me titiro hoki ki tētahi o ngā hanga tau, arā, mehemea he taurua rānei, he taukehe rānei.

He taukehe te pū o te rīpeka tupua i runga. Ka pēhea ina tuarua kē te pū? Hei tauira:

Na, māu e whakakīkī ki ngā tau e toe ana. Ina tatū te rīpeka tupua, tukuna mai te whakaahua. 

Ki te whakaaro koe, kāhore rā e tutuki, me whakamārama mai ngā take o tēnā whakaaro.

Hei te wā!

RĪPEKA TUPUA 2

Tēnā koutou!

Ko te tūmanako kua kitea ētahi rīpeka tupua kē atu – ehara i te mea kotahi anahe. Tukuna mai he whakaahua o ngā mea i kitea ai.

Anei hoki tētahi tino pātai. He aha koe e mōhio ana kāore he rīpeka tupua kē atu e mau nā ngā tau e rima, i te 1 ki te 5?

He ngāwari te tuku whakaaro mai, engari te tuku whakamārama reo Māori mai!

RĪPEKA TUPUA 7-14T

Kia ora koutou katoa! 

Nau mai ki te putanga tuatahi o te rātaka nei. 

E tino rata ana ahau ki ngā mahi a te hunga nrich.maths. Hei tīmatanga, ka huri atu tātou ki tētahi o ā rātou mahi, arā, ko ngā 'rīpeka tupua'.

Anei ngā tapawhā e rima. Kua waitohua ki ngā tau, i te 1 ki te 5.

Ka nukunukuhia kia huri ai ngā tapawhā hei rīpeka. Anei ngā tauira e rua.
    

Kotahi anahe te rīpeka tupua o runga. Ko tēhea? He aha i 'tupua' ai?

Mehemea he tikanga tāu, rapua ngā rīpeka tupua kē atu ka puta i ngā tapawhā e mau nei aua tau i te 1 ki te 5. E hia katoa ngā mea tupua?